Lu pittore

Lu Pittore
(Fabrizio Martello)

Te sempre me 'ddummandu percete alla natura
Nu nc'ete mai n'artista te puisie o te pittura
Ca resce 'ddice e mostra cu tale e quale cura e amore
Lu criatu cussì comu l'ha pittatu lu Signore.
Muntagne janche e rosa e lachi... specchi te vallate,
Tramunti a mare russi e turchesi matinate.
Te giurnu vitti n'upupa vasare na farfalla,
Carizza te cialona e na matusa saliu 'ngalla.
A 'ffundu 'nturtijati marmi te cocciuli e pacuri
E mille culuri e mosse te sciutei e spetacaturi.

Percete a su sta terra, ca vista te la luna
È la cchiù beddha steddha, amicu, pensi alla furtuna?
'Cci serve 'tte 'rricchisci ci poi nu t'hai gustare
L'amici e la famija e te racordi hai te schiattare?
Essi, camina a' nfore e fatte toi passi a 'nnanzi 'mmare,
Spetta, nu timire, fessa, 'ndora st'aria t'uricane.
Quarda lu Criatu 'ccu 'll'occhi t'ommu ca te crai, sine, nc'ete certezza,
Puru la scienzia se nd'have 'ddunata: pracise leggi 'ncucchiate a bellezza.

Percete la vita è comu nu quatru ca Diu 'ssulu have pittare...
E teve t'hai mintire 'mposa addhu meju poti stare!
E comu l'artista sape scunde li tesori e l'acchiature,
Nu te mintire 'mmienzu: tande valore alle vande scure.
Ann'angulu jeu 'cchiai toi smeraldi ca me brillara e me 'nchira lu core:
Te coste me misi 'mposa e uliu nde pitta... nu sonnu t'amore.
(Agosto 2005)