'A vita

Mpapucchiato d' 'a speranza
'e dimane l'òmmo parla,
senza arricietto e cu mille smanie
scetanneso ogni matina
fa discorse pe' tutt' 'a vita;
appriesso a llì stagione
cu'o core'ncantato
se ne va annamurato
a spasso p' 'o munno,
si mentre corre o passea
pe' suspirà se ferma,
nfilato'o filo d' 'a fantasia,
si nun arricama suonne
cóse o arrepezza pruggetto.
Maje cuntento, maje sazio,
si spenn' 'a putega d' 'a vanità,
'e còse s'arrobbe cu l'uocchie:
'a meglia rrobb' 'a vò p'isso!
Si s'affiata cu na femmena,
s'accatta figlie ca danno penziere.
Saglie, scenno,
corre mmiezzo all'anne
ca passano fujenno;
cu na smania d'alleria
pe'luntano part' 'e pressa
affruntann'o destino;
cu curaggio aspetta,
ca chissà, si pè na vota
nu suonno suoje s'avvera!
Nu bello juorno,
a ntrasatto, senza sciato
annanz' ' a na sagliuta,
a quatt'uocchie, po' c'appura?
Appura ca na frònna secca
è addeventato! Nu filo'e vita
appena le rìmmane!
Senza parlà, appucundruto
s'arritira dint'a n'angulo scuro
e, pigliannes'a vita comme vèno,
là, aspetta ca nu colpo'e viento,
senza scrupulo e pietà,
luntano s' 'o porta
dint'a nu fuosse cupo!
Comm'a tutto chesto
'e vvote aggio pensato!
M' 'o saccio, 'o veco, 'o sento
ca tutt'o rummore d' 'a vita,
mo pe' uno, mo pe' n'ato,
sulo silenzio po' addiventa;
sciuè sciuè, 'a vita s'accucciuleja
comm'a nu cane ca s'arretira
doppo tanta abbajo,
tale e quale a' o rummore
'e na banda ca scassea
dint'a strada 'e nu paese,
ca quann'a sunat' 'o gran finale,
moggia moggia, zitto zitto,
s'alluntana e cchiù nun sona!