Abà ghjà possu cantà

Abà ghjà possu cantà
lu tulmentu è finutu
cilcà decu d'olvidà
chi l'amòri m'ha firutu

La sò cara è un tristu ammentu
lu mé cori si pultesi
ed èu solu cu lu pientu
middhi lagrimi lampési

Di biddhesa parìa incantu
maraigliòsa, dulci e suai
chistu cori poaru e affrantu
di stuccatà no spunìa mai

Centu 'olti la pricuntesi
di rigalammi lu sò amori
iddha invecci mi lassesi
a murì di lu dulori

Attidiatu cu la solti
di campà no aìa più gana
chissa femina tirana
desi a me guasi la molti

Abà tuttu ghjà è passatu
e turrata è l'alligrìa
possu dì d'esse sanatu
più no stocu in tribbulìa