A Morgana

Aviri un gattareddu pi la casa
è cosa bedda, 'na gran compagnia
e ti duna confortu a ogni mumentu,
ju haju a Morgana
chi eni la gatta fimmina di casa,
eni bedda, russa comu 'na liuna
è duci e bedda
cu sentimenti chi mancu 'na cristiana,
si sugnu 'nta lu lettu
idda vicinu a mia si curca
e cu la manuzza m'alliscia la faccia.
Ma nun sempri è cosa cognita
Morgana ogni tantu va 'n caluri
e allura diventa strana
curri, si ferma e si strica 'nterra
abbrazza l'aria e si lamenta
movi a compassioni tuttu lu palazzu
la notti la fa jornu
e nuddu chiù arriposa 'nta la casa.
Ogni tantu si veni a striga a la me gamma
aisa la cuda e si lamenta
cu l'occhi lacrimusi
mi dici chi vulissi esseri aiutata.
Ju certi voti mi movu a cumpassioni
la pigliu, l'allisciu e ddà mi fermu,
la patrona è dda vicinu
e nun approva lu me 'ntentu!