Li monaci e la fimmina sperta

C'era 'na vota a lu nostru paisi di la Sammuca 'na coppia di spusini chi circavanu di jiri avanti, ma la fimmina era troppu bedda e quannu niscia pi la strata tutti li masculi si firmavanu a talialla, cc'eranu puru a lu cummentu di li cappuccini 'na maniata di monaci chi a chista picciotta la 'nsurtavanu, chi assulutamenti la vulianu cunfissari, chi la vulianu cumminciri, e tutti a dirici chi la vulianu cunfissari a la sò casa. Quannu sta fimmina nun nni potti cchiù, pigliau e lu dissi a lu maritu. Iddu si la pinsau e cci dissi a la muglieri:
"Sunnu tri li monaci"? Dicci di si, a unu a unu, a unu pi vota e cci duni appuntamentu a la tò casa a uri diffirenti, a unu cci dici chi avi a veniri a li novi, a l'autru cci dici chi avi a veniri a li deci e all'urtimu cci duni appuntamentu pi l'unnici. Sta bona e attenta, parlaci in manera chi nuddu di l'autri capisci nenti".
La fimmina fici comu cci dissi lu maritu, parlau cu li monaci ognunu pi li fatti sò e a la fini cci dicia:
"Però quannu trasi m'avi a dari cent'unzi".
Cent'unzi a ddi tempi eranu beddi sordi, ma la fimmina era bedda e li monaci basta chi arrivavanu a lu scopu eranu disposti a la quarsiasi cosa.
Quannu si ficiru li novi, lu primu monacu si prisintau a la casa di li spusini, tuppiau e mentri chi lu maritu chi era dintra s'ammucciau, la muglieri ju a grapiri la porta. Lu monacu trasiu e subitu la fimmina 'ncatinazzau la porta.
"Sapi" - cci dissi - "me maritu eni fora ma nun si po' mai sapiri".
"Si, si, veru eni", lu monacu a un corpu cci cuntau li cent'unzi. La fimmina mancu appi lu tempu di jiri a sarvarli chi a la porta quarcunu si misi a tuppiari: Tum, tum, tum.
"Cu eni ddocu"? - dumannau la patruna di casa.
"A cu aspetti"? - rispunneru di fora - "Sugnu tò maritu".
"Gesù, Gesù, e comu e fari ora"? La fimmina si muvia comu si cci avissi cadutu lu celu supra la testa.
"Vinissi ccà, frati santu, trasissi dintra stu furnu".
Cc'era un gran furnu dunni cci facianu lu pani e a forza di spingiri fici trasiri lu monacu dda dintra. Poi curriu pi grapiri la porta. Lu maritu facia finta di essiri siddiatu.
"Tantu cci voli pi venimi a grapiri"?
"Ma chi voj di mia? Eru dda dintra chi mi stavu priparannu pi nesciri e poi a prima chissa mancu t'avia canusciutu".
"Ma chi stai dicennu, perciò la vuci nun l'hai ricanusciuta"?
"Chi voj, nun eni chi staju sempri cu l'aricchi a la porta, haju li me chifferi casa casa".
"Basta accussi, ju purtau un fasciu di brizzulinu e di spinapuci, ora li mittemu dintra lu furnu quantu stasciunanu e poi quannu camiamu lu furnu sunnu beddi sicchi e lu pani veni sapurusu".
"Ma chi fai scherzi? Giustu giustu dintra lu furnu l'agghiri a mettiri sti spini? Mettili 'nta un cudicinu chi nun dannu fastidiu o dda sutta 'nta la stadda".
"Noo, ti dissi chi la mettiri 'nta lu furnu e basta".
Idda a diri sempri di no e iddu a diri di si, chi li ligna l'avia a 'nfilari dintra lu furnu. Ddi brizzulini traseru dintra la vucca di lu furnu e si nni jeru a 'mpiccicarisi dintra la carni di lu monacu chi si fici stari comu lu guvitu di Gesù Cristu. Ma lu mischinu pi lu scantu di essiri scupertu di lu maritu nun dissi mancu 'na parola. 'Nta lu frattempo si fici l'ura chi avia a veniri l'autru monacu. Comu tuppiau lu maritu nisciu di la porta fausa. Lu monacu trasiu e subitu la fimmina cci dumannau li sordi.
"Li cent'unzi però vossia prima mi l'avi a dari".
"Nun ti priuccupari, vidi? Cca cci sunnu li cent'unzi. Nun ti scantari chi doppu ju ti li dugnu".
"Nonsi, vossia ora mi l'avi a dari".
Lu monacu cci cuntau li sordi, appena la fimmina appi 'nta li mani li sordi e si muviu pi ghilli a sarvari, arrè si 'ntisi tuppiari: Tum, tum, tum.
Dici idda", "Cu eni ddocu"?
"A cu aspetti? - cci rispunniu di fora lu maritu- jò sugnu, tò maritu".
"Signuri Ddiu ajutami tu, e ora comu fazzu pi nun mi fari scopriri"?
"Nenti, nun si scantassi, ddocu darre ssa tenna cc'è 'na cascia cu quarchi cosa vecchia, vossia s'ammuccia ddocu dintra chi iddu eni sicuru chi nun lu veni a circari".
Accussi fici l'omu di chesa, la fimmina lu cummigliau cu quarchi 'mbroglia e chiudiu lu cuperchiu.
"A ma sbarazzari sta cascia chi cci a mettiri un crucifissu, ju nni cumprau unu beddu granni e lu vogliu sarvari nni sta cascia".
"Chi fai scherzi? Lu crucifissu dintra sta cascia vecchia la ghiri a mettiri"?
Insumma iddu a diri si, idda a diri di no. A la fini lu maritu si pigliau la ragiuni.
"Nca chi te diri lu maritu, La cascia eni vicchiaredda chiantaci quattru chiova quantu la rinforzi".
Dittu e fattu, lu maritu pigliau quattru chiova parmarizzi e li chiantau a la cascia ma eranu accussi longhi chi passavanu la tavula e ghianu a pirciari li carni di lu monacu chi era 'nchiusu dda dintra. Iddu, dda dintra si sintia li chiova trasici dintra la carni ma nun putia gridari senza rischiari di moriri ammazzatu.
Amuninni chi s'avia fattu l'ura chi avia a veniri lu terzu monacu. Comu iddu arrivau, tuppiau e subitu la patruna di casa lu fici trasiri. A lu solitu, idda vosi subitu li cent'unzi cunsignati di lu monacu, iddu all'iniziu, fici quarchi storia, ma a la fini si cumminciu.
"Cca cci sunnu li cent'unzi".
La fimmina si li ju a sarvari a lu stessu postu e doppu quarchi minutu ancora 'na vota tuppiau lu maritu. Lu monaci allura si misi a trimari tuttu.
"Ah, Signuruzzu meu, comu e fari ora"?
"Dda dintra cc'eni 'na utti vecchia, si po' mettiri dda dinta, sicuru chi me maritu dda dintra nun cci veni a circari".
Accussi fici, s'infilau dintra la utti e la fimmina cci misi supra lu cuperchiu e poi curriu a grapiri. Lu maritu paria arrabbiatu pi veru.
"Accussi, perciò tu mi fai aspittari tuttu stu tempu darre la porta"?
"Ma jò nun sapia cu era e cu nun era. Tu nun e chi mi dicisti chi nun avivi a veniri, perciò prima di grapiri ju a essiri sicura di li fatti mei".
"Vinni pi veniri a sistimari ssa utti. A nautri quattru jorna arricampamu lu mustu e nautri semu ancora a nenti. Av'abbunnari sta utti oppuru no"?
"Ma accammora chi prescia cc'eni, maritu meu - dici la muglieri - dumani si nni parla".
"Taju dittu chi chissu eni travagliu chi a m'affari oggi, ora la facemu abbunnari, cci strincemu li circuli e cci mittemu lu cuperchiu e comu eni pronta l'ainchemu d'acqua".
Pi prima cosa lu maritu pigliau quattru chiova e 'nchiuvau lu cuperchiu quantu lu monacu si cu la testa facia forzu pi nesciri, ristava dda dintra. Doppu quarchi ura chi li monaci di lu cummentu stettiru dda dintra nni dda pusizioni tristi, la muglieri facennu finta chi pi un mumentu lu maritu s'avia arrassatu pi ghiri a pigliari 'na cosa, idda fici nesciri lu monacu chi era ammucciatu dintra lu furnu.
"A manu a manu - cci dicia la fimmina - currissi fora chi me maritu eni cca da un minutu all'autru e si lu trova cca, eni capaci di ramiallu".
Lu poviru monacu mancu si lu fici diri e tuttu 'nsanguliatu com'era s'arrizzulau scali scali e via di cursa versu lu cummentu. Accussi lu primu, accussi lu sicunnu.
Pi lu monacu 'nchiusu dintra la utti, lu maritu quannu trasiu dintra pigliau la utti e la nisciu fora 'nta la strata, vitti un picciuttunazzu e lu chiamau:
"A ttia, picciottu, veni cca".
Lu maritu cci detti dui sordi e cci dissi di falla ruzzuliari pi tutta la strata finu dda sutta nni li Ninì. Lu picciottu nun era cummintu e pinsava chi dd'omu vulia schirzari: "vossia voli schirzari"?
"E picchì"? Ju mi vogliu pigliari stu piaceri, tu mentri la utti si va arruzzuliannu e va a sbattiri a la banchina, pigli e la rimetti pi la strata finu a quannu arriva dda sutta".
"Jncà, ju chi cci sacciu, a vota chi vossia mi paga, ju stu piaceri cci lu fazzu passari".
Accussi ficiru, la utti cuminciau a rizzuliari e lu monacu, mischinu 'n'anticchia sbatta li rini e 'n'anticchia sbattia la testa, a un certu puntu la utti pigliau pennulu e cuminciau a curriri finu a quannu ju a sbattiri a 'na cantunera e si sfasciau. Tuttu ammaccatu e mezzu mortu lu monacu nisciu e cutulinu cutulinu, pigliannu a lu fora fora di lu paisi si nni riturnau a lu cummentu.
Quannu fu ura di diri la missa, si visteru attillatissimi e si nni eru a la chesa. Quannu li vitti unu di chiddi tri monaci chi stava cilibrannu missa, ajsau lu cantu.

1 2 3 4

2 commenti

0 recensioni

un altro testo di questo autore un'altro testo casuale

0 recensioni:

Per poter lasciare un commento devi essere un utente registrato.
Effettua il login o registrati

2 commenti:

Anonimo il 18/06/2012 15:35
Bel racconto dal sapore boccaccesco. Scritto in dialetto diventa ancora più divertente. ciao
Anonimo il 10/06/2012 15:42
Tre uomini di chiesa gabbati alla grande da una coppia di sposini... ben sta loro. Bellissimo racconto e immagino faticoso da scrivere come ogni dialetto ma davvero gustoso, perfetto!

Opera pubblicata sotto una licenza Creative Commons 3.0

- Altre opere simili -